د غزني دولتي پوهنتون او خاتمالنبیین (ص) پوهنتون د غزني څانګې، تر منځ د علمي او څېړنیزو همکاریو د تفاهم لیک د مفاداتو د پلي کولو په لړ کې، د “علمي څېړنو کې د مصنوعي ځيرکتيا کارول” تر عنوان لاندې یو تخصصي روزنیز ورکشاپ د ۱۴۰۴ کال د سرطان په ۲۳مه نېټه د غزني دولتي پوهنتون استادانو لپاره د پوهنتون د علمي څېړنو معاونیت په عمومي غونډو تالار کې په حضوري بڼه ترسره شو.
دا ورکشاپ چې د غزني دولتي پوهنتون د څېړنو معاونیت، د خاتمالنبیین (ص) پوهنتون، د غزني څانګې د علمي څېړنو آمریت او د اقتصاد پوهنځي د الکترونیکي زدهکړو کمېټې په ګډه همکارۍ جوړ شوی و، د قران کریم د مبارکو آیاتونو په تلاوت پیل شو او د اقتصاد پوهنځي د علمي پلاوي غړي او د الکترونیکي زدهکړو فرعي کمېټې مسوول پوهنیار جلیل کریمي په وینا سره دوام وکړ. استاد کریمي په دې برنامه کې لاندې مهمې موضوعګانې ګډونوالو ته تشریح کړې:
1. د Perplexity پرمختللو مصنوعي ځيرکتيا سيستمونو پېژندنه
2. د NotebookLM په واسطه د څېړنیزو معلوماتو راټولولو او پروسس کولو غوره لارې چارې
3. په علمي څېړنو کې د هوښیار منځپانګې تحلیل تخنیکونه
د یادونې وړ ده چې په دې برنامه کې د غزني پوهنتون د علمي پلاوي غړو، څېړونکو او اداري مسوولینو د پام وړ ګډون، د علمي او عملي نظریاتو د تبادلې لپاره یو ګټور چاپیریال رامینځته کړ او ګډونوالو د هوښیارو څېړنیزو زیربناوو پر پراختیا، د لا پرمختللو روزنیزو دورو پر ډیزاین او د علمي همکاریو شبکې پر رامینځته کولو ټینګار وکړ.
