د خاتم النبیین (ص) پوهنتون د غزني څانګې د حقوق او سیاسي علومو پوهنځی د محصلینو لپاره د نشاط د رامنځته کولو او د خپل کلني عملیاتي پلان پلي د کولو په موخه د دوشنبې په ورځ (۲۲/۵/۱۴۰۳) د غزني ولایت په خواجه عمري ولسوالۍ کې د سالم چاپېریال د حق تر عنوان لاندې خپلو زده کوونکو ته د علمي-تفریحي سفر پروګرام جوړ کړ.
د دغه علمي – تفریحي سفر د مدیریت چارې د حقوق ډیپارټمنټ آمر ښاغلي ډاکټر حسن رضا شایانفر په غاړه درلود او په دې سفر کې د پوهنتون د علمي څېړنو آمر ښاغلي ډاکټر کامران هم حضور درلود او له محصلینو سره یې ملتیا کوله.
په یوه شنه او ارامه فضا کې د محصلینو له اوسیدو وروسته ښاغلي ډاکټر شایانفر د سالم چاپیریال د حق په اړه خبرې وکړې او ویې ویل:
د سالم چاپیریال حق په نننۍ نړۍ کې یو له اساسي بشري حقونو او حیاتي مسلې څخه دی چې حساسیت او پاملرنه ورته یوه اساسي مسله ګرځیدلې ده. د علم او ټکنالوژۍ پرمختګ د طبيعت د تسلط او استثمار زياتېدو ته لاره هواره کړې ده، تر دې حده چې د هغې ساتنه او د ککړتيا مخه نيول په معاصره نړۍ کې يو له مهمو مسايلو څخه ګڼل کېږي. د حقوق آمریت دخپلې وینا په یوه بله برخه کې څرګنده کړه چې نن ورځ د سولې دحق او د پرمختګ دحق ترڅنګ د سالم چاپیریال حق د بشر د حقوقو د دریم نسل په توګه پیژندل کیږي او په نړیوالو قوانینو کې د ازادۍ او برابرۍ د حق ترڅنګ د سالم چاپېریال حق په رسمیت پېژندل شوی دی.
په پای کې، ډاکټر کامران د جرمونو په ډول باندې د طبیعي چاپیریال اغیزې وڅیړلې او په دې اړه یې د شیکاګو ښوونځي نظریه وړاندې کړه. ورپسې محصلینو د خاتم النبیین (ص) په پوهنتون کې د خپلو زده کړو خاطرې شریکې کړې او محصلینو ته یې د موسمي میوو خواړه ورکړل شول.
