د محصلانو په تعلیمي او اداري چارو کې د روڼتیا، سرعت او دقت رامنځته کولو په موخه او د محصلانو چارو معاونیت په هڅو، د لوړو زده کړو وزارت د PHEMIS سیسټم د معرفي او زده کړې درې ورځنۍ ورکشاپ د خاتم النبيين پوهنتون (ص) غزني څانګې د ریاست په دفتر کې ترسره شو.
په دې ورکشاپ کې، چې د ۱۴۰۴ کال د جوزا له ۵مې تر ۷مې نېټې پورې د پوهنتون د رئیس، مرستیالانو، استادانو او د محصلانو چارو د کارکوونکو په ګډون جوړ شوی و، د محصلانو چارو مرستیال ښاغلي استاد محمدرضا معرفت، د دې ورکشاپ د جوړېدو د موخو بیانولو ترڅنګ، یاد سیسټم ګډونوالو ته وروپېژانده او استادانو ته یې د نمرو ثبتولو، بیا کتنې، د محرومینو او په ازموینه کې د غایبو کسانو ثبتولو، او د دویم او درېیم چانس ازموینو اخیستلو څرنګوالی تشریح کړ؛ همدارنګه یې تدریسي مدیرانو او د محصلانو چارو مسئولینو ته د درسي ټولګیو تنظیمولو، د کریکولم ثبتولو، د محصلینو د ګروپونو تنظیمولو او استادانو ته د درسونو وېشلو څرنګوالی بیان کړ.
د یادونې وړ ده چې د PHEMIS سیسټم په دې وروستیو کې د افغانستان د لوړو زده کړو وزارت له خوا د خصوصي پوهنتونونو د تعلیمي چارو مدیریت لپاره په لاره اچول شوی دی.
