د حقوق پوهنځي د نویو شامل شویو محصلینو لپاره د ۱۴۰۴ تحصیلي کال د پسرلي سمستر معلوماتي غونډه د ۱۴۰۴ کال د ثور میاشتې په ۸مه نېټه د دوشنبې په ورځ جوړه شوه. د دې غونډې موخه له ضوابطو، ښوونیزو امکاناتو او د پوهنتون له بېلابېلو برخو سره د محصلینو پېژندګلوي وه، چې د قرانکریم د مبارکو ایتونو په تلاوت سره پیل او د حقوقو او سیاسي علومو پوهنځي د محترم رئیس ښاغلي ډاکټر حمیدي په خبرو سره یې دوام وکړ. ډاکټر حمیدي په خپلو خبرو کې د علم د زده کړې د ژوند دې پړاو ته د نویو محصلینو د ښه راغلاست او مبارکۍ ترڅنګ د زده کړې پر اهمیت ټینګار وکړ او محصلینو ته یې د موجوده فرصتونو څخه د ښې ګټې اخیستنې سپارښتنه وکړه. هغه د خپلو خبرو په بله برخه کې د پوهنتون ماموریت، لرلید او قوانین او مقررات وڅېړل او د پوهنتون بېلابېلې برخې یې د یوازې علم او پوهې د ترلاسه کولو له ځایه هاخوا، بلکې د ځوانانو او محصلینو د معنوي او اخلاقي ودې لپاره د یو مرکز په توګه معرفي کړې. د دې پروګرام په پای کې د پوهنځي د مسوولینو په لارښوونه محصلینو د پوهنتون له بېلابېلو برخو لکه کتابتون، د معلوماتي ټکنالوژۍ دفتر، د نویو شامل شویو محصلینو لپاره د مطالعې سالون، د پوهنتون د مطالعې سالونونه او د کمپیوټر لابراتوار څخه لیدنه وکړه او په دې پوهنتون کې له موجودو امکاناتو او د هغوی د کارولو له څرنګوالي سره آشنا شول.
