د حقوقو پوهنځي د محصلینو د علمي او ټولنیزې پوهې د کچې لوړولو او د درسي موادو او ټولنیزو واقعیتونو ترمنځ د اړیکو ټینګولو په موخه، خواجه عمري ولسوالۍ ته یو علمي او تفریحي سفر وشو.
دا پروګرام چې د پوهنځي رئیس ښاغلي ډاکټر حمیدي، د حقوقو ډیپارټمنټ آمر ښاغلي ډاکټر شایانفر، د پوهنتون علمي غړي ښاغلي ډاکټر اصغري، د علمي څیړنو آمر ښاغلي ډاکټر کامران او د حقوقو پوهنځي محصلینو په کې ګډون درلود، د ۱۴۰۴ کال د چنګاښ په پنځمه نېټه د چهارشنبې په ورځ ترسره شو. په دې پروګرام کې ډاکټر اصغري د چاپېریال او له طبیعت سره د انسان د تاریخي چلند په اړه ارزښتناکې خبرې وکړې.
د هغه په باور، په لومړي پړاو کې انسان د طبیعت تر واک لاندې و، او په دوهم پړاو کې یې ورسره جګړه کوله. په دریم پړاو کې، انسان د پوهې او ټکنالوژۍ په مرسته طبیعت تر خپل کنټرول لاندې راوست او په پراخه او بې کنټروله توګه یې له سرچینو څخه ګټه پورته کړه، هوا او اوبه یې ککړې کړې، ځنګلونه یې ویجاړ کړل او د حیواناتو ډولونه یې له منځه یوړل.
ډاکټر اصغري څلورم پړاو ته د انسان او طبیعت د پخلاینې پړاو په سترګه کتل چې د چاپېریالي ناورینونو له امله د شلمې پېړۍ له دویمې نیمایي څخه پیل شو. په دې پړاو کې، انسان پوه شو چې پر طبیعت بې کنټروله واک چلول به یې پخپله د له منځه تللو لامل شي. په دې وخت کې، د چاپیریال ساتنې غورځنګونه، نړیوال قوانین او د پایښت لرونکي پرمختګ شعار رامنځته شول.
د محصلینو بحثونه د چاپېریال په اړه او د خواجه عمري له ښکلو منظرو څخه لیدنه، د دې علمي – تفریحي سفر وروستۍ برخه وه.
