د هوا د ککړتیا څخه د مخنیوي اونۍ د نمانځلو او د موضوع د اهمیت په اړه د پوهاوي کچې لوړولو په موخه، د ۱۴۰۴ کال د وږي په ۱۳مه نېټه، د پنجشنبې په ورځ، د حقوقي کلینیک په تالار کې، د “په هوا کې د مایکرپلاستیکي ککړتیاوو پېژندنه او د انسان بدن ته یې خطرونه” تر سرلیک لاندې یوه علمي- فرهنګي ناسته جوړه شوه.
دا ناسته چې د فرهنګ، دعوت او اسلامي ارشاد آمریت، اداري او مالي مرستیالۍ او علمي مرستیالۍ په هڅو جوړه شوې وه، د پوهنتون د محصلینو روح الله جعفري لخوا په اجرا او د شهیر جوادي لخوا د قرآن کریم د مبارکو آیتونو په تلاوت سره پیل شوه. وروسته د محترم استاد جلیل کریمي، د اداري او مالي مرستیال او د اقتصاد پوهنځي د علمي کادر غړي، لخوا پرېزېنټېشن وړاندې شو.
استاد کریمي په پیل کې د ګډونوالو شتون ته ښه راغلاست ووایه، وروسته یې د موضوع اړتیا او اهمیت ته اشاره وکړه او دا یې په نړیواله کچه او په افغانستان کې د ملي امنیت لپاره یو ننګونه او ګواښ وباله چې په پایله کې یې بېلابېل امراض، اقلیمي بدلونونه او چاپېریالي ککړتیاوې د بحران تر کچې رسېدلې دي.
د مایکرپلاستیک او نانوپلاستیک تعریف، د مایکرپلاستیک د جذب سرچینې او د انسان بدن ته د هغوی د نفوذ لارې، د مایکرپلاستیک په واسطه د هوا د ککړتیا شدت، د انسان پر فزیکي او رواني روغتیا، پر جنینونو، نسل اخیستنې او راتلونکو نسلونو باندې د هغوی منفي اغېزې او د خطر کمولو لپاره لارې چارې، هغه نور مهم موضوعات وو چې په دې علمي- فرهنګي ناسته کې د اداري او مالي مرستیال لخوا پرې بحث وشو. هغه په دې ناسته کې ګډونوالو ته د خطر کمولو لپاره ځینې لارې چارې هم په ګوته کړې، لکه د پاکو اوبو کارول، د عضوي او له پلاستیکي بستهبندۍ څخه پرته د خواړو کارول، د یو ځل مصرف پلاستیکي توکو د مصرف کمول، په جامو کې د طبیعي فایبرونو کارول او د هوا د فیلټرونو کارول.
