د محصلینو او کارکوونکو د پوهاوي د کچې د لوړولو په موخه د اداري او مالي مرستیالی په نوښت، د محصلینو کمیټې او د غزني ولایت د اور وژنې پولیسو په همکارۍ د سه شنبې په ورځ د 1403 کال د لړم میاشتې په ۱۵ نیټه یو ښوونیز سیمینار جوړ شو.
دغه سیمینار چې د پوهنتون د محترمو مرستیالانو، استادانو، د غزني ولایت د اطلاعاتو او کلتور رئیس ښاغلي مولوي نثار، د غزني ولایت د امنیه قومندانۍ د اور وژنې امر ښاغلي مولوي مسلم او د پوهنتون د محصلیون په حضور کې جوړ شو. غونډه د طب پوهنځی د محصل سیدهادي سجادي له خوا د کلام الله مجید د مبارکو آیاتونو په تلاوت سره پیل شوه او د پوهنتون مالي او اداري مرستیال ښاغلی استاد کریمي په وینا یې دوام وکړ. په دغو خبرو کې استاد کریمي د غونډې ګډونوالو او په ځانګړې توګه د غزني ولایت د امنیه قوماندانۍ د پروګرام ګډونوالو او همکارانو ته ښه راغلاست ووایه او د دې موضوع پر اړتیا او اهمیت یې ټینګار وکړ او په دې برخه کې یې د عامه پوهاوي د کچې لوړول مهم او حیاتي وبلل. ورپسې ښاغلي مولوي مسلم خبرې وکړې او د خاتم النبیین(ص) پوهنتون غزني څانګې څخه یې د دې سیمینار د تنظیمولو له امله مننه وکړه. نوموړی د دغه ډول سمينار د جوړېدو پر اړتيا خبرې وکړې او په دې برخه کې يې د عامه پوهاوي نشتوالى په ګوته کړ. همدا راز نوموړی د غزني ولایت د امنیه قومندانۍ د اور وژنې د مرکز د فعالیت او د هغه د اسانتیاوو او ظرفیتونو په اړه غونډې ګډونوالو ته راپور وړاندې کړ.
د پروګرام بله برخه د زلزلې او اورلګیدنې پر مهال د خوندیتوب د اصولو روزل او د ورته پیښو په صورت کې د مخامخ کیدو او چلند څرنګوالی و چې د غزني ولایت د امنیې قوماندانۍ د اور وژنې څانګې د همکارانو له خوا ترسره شو.
