د غزني څانګې د خاتم النبیین(ص) پوهنتون د پلان او پالیسۍ کمیټې د مسوولینو او کارمندانو د پوهاوي کچې د لوړولو په موخه، د کیفیت د لوړولو او پلان ریاست په نوښت، د ستراتیژیک پلان د جوړولو د څرنګوالي په اړه یو پوهاوي ورکشاپ د ۱۴۰۴ کال د غبرګولي په ۳مه د پوهنتون د ریاست په دفتر کې جوړ شو.
په دې ورکشاپ کې چې د پوهنتون د رئیس، مرستیالانو، د پوهنځیو رئیسانو او د اداري برخې همکارانو ګډون کړی و، د کیفیت د لوړولو او پلان رئیس ښاغلي استاد محمد هادي پویا د ستراتیژیک پلان د جوړولو څرنګوالي ته اشاره وکړه او د هغې د جوړولو اصلي ګامونه یې تشریح کړل. هغه ټینګار وکړ چې د ستراتیژیو د ټاکلو پر مهال د اصلي ګامونو رعایت، د پریکړو واقعي والی، د بودیجې او ټاکل شوو برنامو ترمنځ دقت او توازن رامینځته کول د اغیزمن او کارآمد ستراتیژیک پلان په جوړولو کې مرسته کولی شي.
استاد پویا د ورکشاپ په بله برخه کې یادونه وکړه چې د ستراتیژیک پلان د جوړولو پر مهال د ټولو همکارانو ګډون د هغې د جوړولو په څرنګوالي پوهیدو کې اغیزمن او مرسته کوونکی کیدی شي. باید یادونه وشي چې د ګډون کوونکو پوښتنو ته ځوابونه د دې برنامې وروستۍ برخه وه.
