د زده کړیالانو د پوهاوي د سطحې لوړولو او د زده کړو په لاره کې د پلان او هدف ټاکلو اهمیت ته په کتو سره، د چهارشنبې په ورځ، د وږي میاشتې په ۱۲مه نېټه، د ابوریحان په تالار کې د پوهنتون د مشورې ورکولو مرکز او طب پوهنځي له خوا د «زدهکړې لپاره هدف ټاکلو» تر سرلیک لاندې یو روزنیز سیمینار جوړ شو. دغه پروګرام چې د زدهکړیالانو له پراخ هرکلي سره مخ شو، د قرآن کریم د څو مبارکو آیتونو په تلاوت سره پیل شو او وروسته د حقوقو او سیاسي علومو پوهنځي د استاد او د مشورې ورکولو مرکز مسئول ښاغلي کمالالدین عظیمي له خوا د وینا په وړاندې کولو سره یې دوام وموند.
ښاغلي عظیمي په خپله وینا کې د زده کړو پر مهال د مشخصو اهدافو درلودلو اړتیا او اهمیت، د زدهکړیالانو د انګیزې او تمرکز په زیاتولو کې د هدف ټاکلو رول او د لاسرسي وړ اهدافو د ټاکلو لپاره د یوې اغېزمنې نمونې په توګه د SMART ماډل معرفي کول، د دې پروګرام تر ټولو مهمې موضوع وبللې. هغه په ادامه کې د SMART ماډل په اړه خبرې وکړې او و یې ویل چې روښانه والی، د اندازه کولو وړتیا، واقعبینانه والی، له فردي لومړیتوبونو سره تړاو او مشخص وخت لرل د دې ماډل تر ټولو مهمې ځانګړتیاوې دي. هغه د پروګرام له ګډونوالو سره پر دغو موضوعاتو بحث وکړ.
د پروګرام په پای کې، د ګډونوالو د رضایت کچې د ارزونې او د وړاندې شوې وینا په اړه د هغوی د نظرونو راټولولو په موخه، د نظرپوښتنې فورمې د حاضرو کسانو ترمنځ ووېشل شوې. د دې نظرپوښتنې پایلې به له راټولولو او تحلیل وروسته د مشورې ورکولو مرکز په راتلونکو پلانونو کې په پام کې ونیول شي.
