د هند او پاکستان ترمنځ شخړه علمي سیمینار د ۱۴۰۴ کال د کب میاشتې په ۲۵مه نېټه د اکاډمیسین حضرت آیت الله محسني په غونډو تالار کې ترسره شو. دغه سیمینار چې په عین وخت کې په آنلاین ډول هم خپرېده، د قرآن کریم د مبارکو آیتونو په تلاوت پیل او د بهرنیو چارو وزارت د لومړي سیاسي ریاست د هند د ډیسک مسئول استاد محمد کوثر دولت زي او د خاتم النبیین (ص) پوهنتون عمومي رئیس ډاکټر عبدالقیوم سجادي په خبرو سره یې دوام وکړ. استاد دولت زي په خپلو خبرو کې د خاتم النبیین پوهنتون د علمي – کاربردي غونډو او په ځانګړې توګه د هند او پاکستان ترمنځ د شخړې او د افغانستان پر بهرني سیاست د هغې د اغېزو په اړه د علمي سیمینار په جوړولو کې د هڅو قدرداني وکړه او څرګنده یې کړه چې د افغانستان جغرافیایي موقعیت ته په پام سره، د سیمې د دوو اټومي قدرتونو ترمنځ هر ډول د تاوتریخوالي زیاتوالی د افغانستان او سیمې ثبات ته مستقیم او غیرمستقیم ګواښ ګڼل کیږي او د افغانستان پر امنیت، اقتصاد او سیمه ییزو اړیکو جدي منفي اغېزې لري. هغه د خپلو خبرو په دوام د تاوتریخوالي په اړه د اسلامي امارت موقف ته اشاره وکړه او د افغانستان د اسلامي امارت د دولت له ادرسه یې د هند او پاکستان ترمنځ د تاوتریخوالي د پای ته رسولو غوښتنه وکړه. ډاکټر عبدالقیوم سجادي هم چې په آنلاین ډول په دې غونډه کې ګډون کړی و، په دې علمي سیمینار کې یې د استادانو او محصلینو حضور ته ښه راغلاست ووایه او د هند او پاکستان ترمنځ د تاوتریخوالي منفي اغېزې یې پر سیمې او په ځانګړې توګه د افغانستان پر هېواد او د هغه پر بهرني سیاست باندې بحث کړ او د علمي او تیوریکي تحلیل ترڅنګ یې د واګه لارې تړل او د افغانستان پر سوداګرۍ، بازار او اقتصاد یې مستقیمې منفي اغېزې د دې منفي پایلو یوه نمونه وبلله. هغه د خپلو خبرو او علمي تحلیلونو په پای کې سپارښتنه وکړه چې افغانستان په خپل بهرني سیاست کې په ځانګړې توګه د ګاونډیانو په اړه تل د همغږۍ او دوستانه اړیکو سیاست ته پام وکړي او خپل بهرني سیاستونه په همدې لاره کې سوق او عملي کړي. د یادونې وړ ده چې د خاتم النبیین (ص) پوهنتون د غزني څانګې د حقوقو او سیاسي علومو پوهنځي او د خاتم النبیین (ص) پوهنتون کابل د علمي څېړنو آمریت او د سیاسي علومو او نړیوالو اړیکو ډیپارټمنټ په هڅو، په دې علمي سیمینار کې د خاتم النبیین (ص) پوهنتون د غزني څانګې د استادانو د ګډون زمینه هم برابره شوې وه او د خاتم النبیین د غزني څانګې استادانو په آنلاین ډول په دې سیمینار کې ګډون وکړ.
