د ځمکې د پاکۍ د نړیوالې ورځې د لمانځلو په مناسبت د ۱۴۰۴ کال د ثور میاشتې په ۱۵مه نېټه د دوشنبې په ورځ د خاتم النبیین (ص) پوهنتون د غزني څانګې د حقوقي کلینیک په تالار کې یوه علمي او فرهنګي غونډه جوړه شوه. دا غونډه چې د چاپېریال ساتنې په اړه د پوهاوي د لوړولو او د ځمکې او چاپېریال د سرچینو د ساتنې او پاکوالي لپاره د علمي لارو چارو د وړاندې کولو په موخه جوړه شوې وه او په هغې کې د پوهنتون استادانو، مسوولینو او کارمندانو ګډون کړی و، د پوهنتون د یوه محصل محمدجواد همتا په پرانیستونکې وینا او د پوهنتون د دعوت او ارشاد څانګې د مسوول مولوي صاحب سعید له خوا د قرانکریم د مبارکو ایتونو په تلاوت سره پیل او د علمي مرستیال ښاغلي ډاکټر غلامرضا کریمي او د غزني ښاروالۍ د تخنیکي برخې آمر ښاغلي الحاج فضل احمد مدني په وینا سره دوام وموند.
ډاکټر کریمي د خپلې وینا په پیل کې د غونډې ګډونوالو او په ځانګړي ډول د دې غونډې میلمنو ته ښه راغلاست ووایه او د دې غونډې د جوړولو موخې یې په ګوته کړې. وروسته یې په دې اړه د ملګرو ملتونو سازمان په پالیسیو او شعارونو خبرې وکړې او په پای کې یې د غزني ښار د چاپېریال ستونزې او د هغو د حل لارې چارې تر بحث لاندې ونیولې.
نوموړي د سړکونو د اوبو کولو لپاره د ککړو اوبو څخه ناسمه ګټه اخیستنه، د پلاستیکي کڅوړو زیاتوالی، د شنو ساحو کمښت، د بوټو د ریښو تجارت او د هغو له منځه تلل او د ځمکې لاندې اوبو څخه بې ځایه ګټه اخیستنه د غزني ښار د چاپېریال له ننګونو څخه وبلل او د چاپېریال ساتنې د اهمیت په اړه د خلکو د پوهاوي کچې لوړول، د نیالګیو کښت ته پاملرنه، د پلاستیک له بې ځایه کارولو څخه مخنیوی، د ونو او بوټو ساتنه، د اوبو د سرچینو او په ځانګړي ډول د ځمکې لاندې اوبو مدیریت او نوي نسل ته د طبیعت درناوي په اړه زده کړه یې د دې ننګونو د حل لارې چارې وبللې.
حاجی صاحب مدني هم په خپلو خبرو کې د خاتم النبیین پوهنتون د غزني څانګې له ریاست او مسوولینو څخه د دې علمي او فرهنګي غونډې د جوړولو له امله مننه وکړه او ځمکه یې د خدای تعالی له مهمو مخلوقاتو څخه وبلله او زیاته یې کړه چې خدای تعالی ځمکه پاکه او سپېڅلې پیدا کړې ده، خو د انسانانو اعمالو د هغې د ککړتیا لامل شوي دي. هغه د اقلیم بدلون، د سمندرونو ککړتیا او نور د همدې خبرې پایله وبلله او زیاته یې کړه چې د انسانانو د ناسمو کړنو په اصلاح کولو سره به ځمکه هم پاکه او سپېڅلې شي. مولوي مدني د خپلو خبرو په بله برخه کې د غزني ښار د چاپېریال وضعیت، د هغه د مدیریت لپاره موجودې ننګونې او په دې برخه کې د غزني ښاروالۍ اقدامات تر بحث لاندې ونیول او ژمنه یې وکړه چې «موږ به هڅه وکړو چې د غزني ښار پاک او سپېڅلی وساتو.
